Pinagbigyan kan prosekusyon an kahagadan kan mga respondents sa mga reklamong ipigsunad kan Securities and Exchange Commission (SEC) sa Department of Justice (DOJ) kontra sa mga Villar asin saindang kumpanya.
Sa enot na preliminary investigation, napagdesisyunan kan panel kan mga piskalya na tawan nin dugang na panahon an mga respondents ngani na magsunad kan saindang mga ‘counter-affidavits’.
Enot na hinagad kan mga abogado kan mga respondents an 15 aldaw na palugit, alagad pinalawig ini kan prosekusyon nin labi sa sarong bulan.
Paliwanag ni Senior Deputy State Prosecutor Peter Ong, saro sa mga kinonsiderar kan panel an paparaning Semana Santa o Holy Week.
Huli digdi, ipigtalaan an masunod na preliminary investigation sa Abril 20.
Segun sa prosekusyon na bastante na an itinaong panahon ngani na pag-adalan kan kampo kan mga respondents an reklamong ipigsunad kan SEC.
Hinagad kaini na personal na manumpa an mga Villar asin iba pang respondents sa hampang mismo kan panel of prosecutors.
Pigrekomendar man ni Ong na sumunod an mga ini sa ipigtalaan na oras kan pagdangog.
Kaibanan sa mga ipigrereklamo an Villar Land Holdings Corporation, sinda Manuel Villar Jr., Cynthia Villar, Cynthia Javarez, Camille Villar, Mark Villar, asin iba pa.
Nahahampang sinda sa mga reklamong market manipulation, insider trading, asin misleading disclosures.
