LEGAZPI CITY – Aminado an grupo nin mga parasisira na dae pa nakaka-recover an mga ini sa saindang hanapbuhay huli sa mga raot nin panahon na naka apektar sa nacion.
Segun ki Pambansang Lakas ng Kilusang Mamamalakaya ng Pilipinas President Pando Hicap sa intrevista kan Bombo Radyo Legazpi na dakol an paramientras na dae nakapagpalaot huli sa makusog na ukol kan kadagatan.
Huli digdi, matindi an nagin epekto sa mga parasisira asin sa saindang mga pamilya.
Mientrastanto, hagad man ni Hicap na magin maagap an tabang asin ayuda hali sa gobierno ngani na dae na mapiritan na maglawod an mga ini maski pa maraot an panahon.
Dae kaya suboot maibitaran na dakol an nakaka eksperyensya nin kagutuman kun dae nakakapaghanapbuhay.
Paliwanag kaini na dae maubra an pirmihan na late na ayuda hali sa gobierno na haros dae makapagsalbar sa pamilya kan mga apektadong mga parasisira.
Suhestyon pa kan opisyal na matawan nin daga na mapagtatanuman an mga parasisira ngani na igwa man liwat na alternatibong kabuhayan an mga ini sa mga panahaon na dae sinda nakakapaglawod sa kadagatan.
