LEGAZPI CITY – Ipagbabawal na sa banwaan nin Guinobatan an mga motorsiklo na may maribok na tambutso o modified muffler.
Segun kay Guinobatan Vice Mayor Gemma Ongjoco, pasado na sa Sangguniang Bayan an Anti-Modified Tail Pipe Ordinance na nagbabawal asin nagtatao nin penalidad sa mga magamit nin maribok na motorsiklo.
Basado sa ordinansa, nasa P2,500 an naghahalat na multa sa sisay man na rider na magmamaneho nin motorsiklo na may modified muffler.
Segun kay Ongjoco, ipinaotob an ordinansa base naman sa mga reklamong nareresibe kan saindang opisina hali sa mga residentes na problema an maribok na mga motorsiklo.
Lalo na kung banggi asin nagkakaturog na an mga residentes, dakulang perwisyo an makadangog nin motorsiklo na may modified muffler.
Huli digdi, pangapudan ni Ongjoco sa gabos na mga motorista na magsunod na sana sa ordinansa asin iparahray na an saindang mga motorsiklo ngani na dae matawanan nin penalidad.
