Nakatalaang mag-olay an mga miyembro kan administrasyong Marcos, Jr. nganing pag-ulayan an posibleng pagsasapubliko kan saindang Statement of Assets, Liabilities, and Net-worth (SALN).
Ini an kasunod kan kabi-kabilang inisyatiba kan pirang kongresista asin senador, na isapubliko an kopya kan saindang mga SALN.
Sa press briefing sinabi ni Palace Press Officer Usec. Claire Castro, na ngonian na aldaw nakatalaan an miting kan mga Cabinet officials.
Dae sinabi ni Castro na kaiba si Presidente Marcos sa nasabing pag-oolay.
Ngonian na aldaw nakatalaang maghali kan nacion an Presidente pasiring sa Malaysia nganing mag-atendir sa ASEAN.
Dae pa man suboot malinaw an mga detalye kun may iba pang agenda na pag-oolayan sa nasabing miting.
Nagin matipid man an simbag ni Castro kan hapoton kun makusa si Presidente Marcos sa pagsasapubliko kan saiyang SALN, huli sa kaipuhan suboot na hilingon kun ano an nararapat para digdi.
Naenot nang sinabi kan presidente na preparado man siyang iluwas an kopya kan saiyang SALN kun hahagadon kan Ombudsman o Independent Commission for Infrastructure.
