LEGAZPI CITY – Nakaresibi nin P30,000 an mga kwalipikadong pamilya na nadanyaran kan mahiwasang kasulo sa Barangay Banuyo, Pilar, Sorsogon.
Segun ki Pilar Municipal Social Welfare and Development Officer Anilyn Bon sa intrevista kan Bombo Radyo Legazpi na nai-distribwer kan Department of Human Settlement and Urban Development’s (DHSUD) an naunambitang kantidad sa irarom kan Integrated Disaster Shelter Assistance Program (IDSAP).
Basado sa saindang datos, poco mas o menos 186 na household heads an naaprobaran na magin benipisyaryo kan nasambitang programa.
May mga dae nag qualify huli sa mga guidelines arug suboot kan mga nangungupahan sana asin nagpapaupa kan saindang mga kaharongan.
Mientrastanto, pigtaram pa kan opisyal na natapos na man ninda an orientation kan National Housing Authority kun sain abiso ninda sa mga nasuluan na may abilableng lote na an Gobierno Local kan Pilar para sa saindang paglilipatan.
May pigdesignar na an LGU na parte kan lote kun sain pwedesir na sindang magtugdok kan saindang mga paramientras na maiistaran mantang pighahalat an permanenteng ressetlement houses ninda.
Warang patod suboot an pag-uran nin mga tabang sa mga nasuluan kun kaya syerto ninda na makakabuwat an mga ini sa sakunang nangyari sa saindang lugar.
Sa presente, pighayag ni Bon na maabot pa sa poco mas o menos 100 na pamilya pa an nagtetenir pa sa mga evacuation center kun sain pighahalat kan mga ini na matapos an ressetlement program.
