LEGAZPI CITY — Kinontra kan kampo ni Daraga Mayor Carlwyn Baldo an mga nagsasabing delaying tactics an mga pigigibo sa mga kasong kinakahampang, imbes tinawang-duon na nagsusunod sa due process.
An nasabing alkalde an nahahampang sa kasong double murder asin multiple frustrated murder katakod kan panggagadan ki AKB Party-list Cong. Rodel Batocabe, Pol. SMSgt. Orlando Diaz magin an pagkakairido kan nagkapirang nag-atendir sa gift-giving event kan Disyembre 22, 2018.
Sa presscon na ipinaapod kan kampo ni Baldo, nilinaw ni Atty. Merito Lovensky Fernandez, saro sa mga legal counsel kan alkalde, klarado na nakakaag sa rules kan Korte Suprema an pagtatao nin oras sa respondent na makasimbag sa mga alegasyon durante kan preliminary investigation.
Nagtutubod man an abogado na parte kan pulitika an nangyayari urog pang nadadangog suboot kan kampo na igwang mga nagmamawot na makarsel an alkalde antes pa man an pirilian.
Patutsada pa ni Atty. Fernandez na garing “pig-railroad” an kaso kaya’t nagsumiter nin mga Motion for Inhibition urog na sa piskalya sa Camarines Sur asin urgent motion sa special raffle kan kaso.
Mientras tanto afuera sa suboot pag-railroad, mismong an mga ipigpresentar na ebidensya an nahilingan nin discrepancy urog na an pigsasabing mga badil asin testimonya kan mga suspek na warang corroboration.
