LEGAZPI CITY – Nahilingan nin pagbaba ngonian na taon an mga insidenteng kina-imbweltuhan kan tren kan Philippine National Railways.
Segun ki Philippine National Railways General Manager Engineer Deovanni Miranda sa intrevista kan Bombo Radyo Legazpi na basado sa saindang datos, uminabot na sa 4 na insidente nin side swiping na kina-imbweltuhan kan tawo poon kan nakaaging Enero hasta ngonian na Hunyo mantang uminabot man sa lima an nairehistrong vehicular accident na kinaimbweltuhan kan tren sa parehong peryodo.
Kun ikokompara suboot kan nakaaging taon, nahilingan nin labing pagbaba an mga insidenteng nairehistrong kina-imbweltuhan kan saindang tren maski dae pa tapos an taong 2025.
Paliwanag pa niya na may mga nakadesignar na mga signal-man o flag man na nagmamando sa mga nag-aaging behikulo asin publiko enkaso maagi na an saindang tren alagad kalimitang nasa residensya an pinangyayarihan kan mga nairehistrong insidente.
Aminado man an opisyal na difisil makontrol an mga kurbadang parte kan riles asin may mga nagtetenir harani sa riles an nagkakaigwa nin dakulang huma huli sa pwedeng mangyari sainda enkasong nag-aagi an tren.
Wara mang patod an saindang clearing operation sa mga riles nganing masyertong warang ulang asin salbado an mga commuter siring na man sa mga residenteng nasa riles.
Sa presente an nakikipagkoordinar na man sinda sa mga Barangay Official, lokal na gobierno, eskwelahan, Land Transportation Office, Land Transportation Franchising and Regulatory Board, Philippine National Police, asin iba pang ahensya nganing mabawasan an mga insidente na kina-iimbweltuhan kan saindang tren.
