LEGAZPI CITY – Padagos na pigmomonitor kan mga otoridad asin mga barangay officials an mga evacuees na nagtemnir sa Ibalong Centrum for Recreation huli sa huma ni bagyong Opong.
Segun ki Ibalong Centrum for Recreation Head Roderick Abadeza sa intrevista kan Bombo Radyo Legazpi na sa presente an nasa maray na kamugtakan an mga nasa pamilyang nagtetenir sa nasabing lugar.
Kabale sa mga pamilya an mga hale pa sa mga barangay kan San Roque asin Bitano sa ciudad kan Legazpi mantang nagbisita na man sa lugar si Mayor Hisham Ismail asin naghahalat sinda nin direktiba mapadapit sa masunod na lakdang.
Kadaklan man suboot sa mga pamilya an paramientras munang nag-uuli sa kaniya-kaniya nindang harong nganing hilingon kun may nadistroso sa saindang kaharongan asin nagbabalik man sana tulos huli ta dae pa pigtutugutan an pag-uli ninda.
Pigtaram pa kan opisyal na pighahalat ninda an permiso kan lokal na gobierno para sa decampment kan mga evacuees.
Pighayag pa ni Abadeza na pig-abisuhan man kan mga opisyales kan duwang barangay an saindang mga residente na linigan an saindang mga napwestuhan antes mag-uli mantang may naka-standby na man sindang personahes para sa paglilinig sa oras na mag-decamp na an mga evacuees.
