LEGAZPI CITY – Nangapodan an grupong Octa Research sa mga botante ngonian na nagdadangadang na 2025 Midterm Election na dae magpadara sa mga kandidato na imbwelto sa vote buying.
Katakod ini kan isinagibo nindang survey na nagluwas sa pinakabagong survey grupo na 66% o 2 out of 3 na mga pilipino an nagtutubod na magigin talamak an bakalan nin boto.
Segun ki Octa Research Fellow Dr. Guido David sa intrevista kan Bombo Radyo Legazpi dapat isipon kan mga botante na kapalit kan ginhawang ipigtao para sa impluwensya kan sarong kandidato an magtetenir sanang paramientras na kaginhawaan.
Wara man kuta suboot na problema na magbarewas nin ayuda huli ta parte suboot ini kan programa kan gobierno alagad dae pwedesir ining gamiton nganing makapag-impluwensya sa sarong tawo ngonian na pirilian.
Nasasabotan niya na mapagal an trabaho kan comelec poon sa integridad kan pirilian, pagpapalakop kan fake news asin an mga ilegal na campaign posters.
Hapot ni David sa mga botante kun problema an vote buying na dapat an igwa sindang sulusyon huli ta kun warang gigibuhon sindang aksyon, an padagos na mahirap an saindang mga buhay asin magpapadagos an siring kaining kalakaran.
Pwedesir na masundan pa an saindang survey sa mga masunod na bulan asin may iluluwas na sindang bagong resulta kan saindang isinagibong survey mapadapit sa senatorial bets.
Paglilinaw kaini na piggigibo ninda an pagsurvey nganing maaraman kan mga pilipino an mga naglilitawan na mga problema mapadapit sa pirilian arug kan vote buying.
Pagirumdom ni David sa mga botante na pilion an long term benifits sa paagi kan pagtama kan tamang lider huli ta pwedesir na habang buhay an matatamasa na benipisyo kan mga namamanwaan.
