LEGAZPI CITY — Nalalay kan mga parahabas an manlaen-laen na kalibre nin badil makalihis an panlalaog kan mga ini sa harong kan sarong negosyante sa subdibisyon sa Tahao Road, Legazpi City.
Sa paenot na imbestigasyon kan mga otoridad, nagluluwas na nagsakat sa kongkretong pader an mga parahabas hasta sa makaabot sa ikaduwang palapag kan terrace kan harong kan negosyanteng si William Bercilla kun saen pirit na binuksan an sliding door na ginamit bilang entry point.
Pigtutubudang nagbaba an mga ini sa lobby kan harong kun saen nahiling asin nakua kan mga ini an sarong itom na body bag na laog an sarong yunit kan caliber 45 pistol, duwang magazine na may 26 na rounds nin bala mantang dae mna nakasalbar an sarong gray na body bag na laog man an sarong yunit nin Glock 17G 9mm pistol kasabay an tulong magazine na may 50 rounds nin bala.
Makalihis na makua an mga gamit, tulos na nagdulag an mga dae pa nabibistong suspek.
Mientrastanto, naglalaom man an 55-anyos na negosyante na makukua an mga nasabing armas siring man madadakop an mga suspek urog na peligroso an mga nakuang armas na posibleng magamit pa sa iligal na paagi.
