LEGAZPI CITY-Nagpatanid si Senador Sherwin Gatchalian nin imbestigasyon sa suboot alegasyon nin kurapsyon laban sa liderato kan Bureau of Immigration (BI).
Nangapudan si Gatchalian nin mas mahigot na pag-implementar kan polisiya kontra sa Philippine Offshore Gaming Operators (POGO), urog na sa aspeto kan pag-deport kan mga dayuhan na imbuelto sa industriya.
Segun sa Senador, na nag-file kan Senate Resolution No. 1381, an salang implementasyon kan polisiya laban sa Philippine Offshore Gaming Operators (POGO), orog na sa pagpreso asin pag-deport kan mga dayuhan na imbuelto digdi, pwedesir magresulta nin mga loopholes sa satuya na mga polisiya asin magtugot sa padagos na operasyon kan mga maraot na operator kaini.
Tinawan duon kan Senador, na iyo an nangenot sa adbokasiya na halion an operasyon sa nacion, na posibleng magresulta sa saindang paglikay sa paninimbagan, an depektong proseso kan pag-deport kan mga dayuhan na imbuelto sa operasyon na ini.
Nagkapira sa mga empleyado kan Bureau of Immigration an nagpadara nin surat sa Presidente na nag-aalegar nin pag-abuso sa poder kan sarong halangkaw na opisyal kan mismong ahensiya, kabali na an pinarikas na piyansa kan mga dayuhan na konektado sa mga Philippine Offshore Gaming Operators (POGO), siring man an mga poderosong pigura sa industriya.
Sinabi man kan mga empleyado na may nagluwas na bagong modus operandi na obhetong ipabakal an permanenteng quota visa sa pinakahalangkaw na bidder.
Pagirumdom man ni Senator Gatchalian na kaipuhan na itama an korapsyon sa ahensya na dapat magpaotob kan ley asin panuon an mga kulang sa satong mga regulasyon.
