Narecover kan Caramoran Municipal Police Station an sarong motorsiklo na hinabon sa Barangay Tubli, Caramoran, Catanduanes.

Segun ki PLT Mar Joseph Reburiano, Chief of Police kan Caramoran MPS, sa intrevista kan Bombo Radyo Legazpi, nangyari an motornapping kan maagahon kan Nobyembre 17, alagad pormal na pigreport sana ini kan Nobyembre 18.

Nahiling kan tagsadiri na nawawara an saiyang nakaparadang itom na Suzuki Smash sa atubangan kan saindang tindahan.

Sa tabang kan barangay officials, pagrebyu sa CCTV footage, asin impormasyon hali sa sarong concerned citizen, natunton an motorsiklo kan banggi kan Nobyembre 19.

Narecover ini sa gilid kan salog sa Barangay Obi, Caramoran, alas 7:20 nin banggi.

Sa operasyon na kaibahan an Municipal Social Welfare and Development Office (MSWDO) asin mga opisyal kan barangay, nadiskubre na sarong menor de edad o child in conflict with the law an imbwelto sa insidente.

Nagpaabot man si Reburiano nin pagiromdom sa mga tagsadiri nin motorsiklo na siertuhon na nakakandado asin nasa maliwanag na lugar an saindang behikulo, asin sa mga magurang na giyahan nin maray an saindang mga aki.