LEGAZPI CITY- Ipighayag ka sarong political analyst na si Manila Mayor Isko Moreno man giraray an nahihiling na mahigot na makakalaban kan administrasyong Duterte para sa 2022 presidential elections.
Sa eksklusibong intevista kan Bombo Radyo Legazpi kay Prof. Clarita Carlos, Political Science Professor kan University of the Philippines, haros nagkakatapat man giraray sinda Yorme asin Davao City Mayor Sarah Duterte pag-abot sa survey para sa mga presidential bets na iboboto kan mga Pilipino.
Alagad segun sa political analyst na bako pang malinaw sa ngunyan kung madalagan talaga bilang Presidente si Mayor Isko o re-eleksyonista bilang alkalde kan Manila sa ibong kan dakol na mga nagbubusol para sa pagdalagan kaini.
Pinaglalaoman man na mag-abot hasta sa anom an magiging presidential candidates kan nasyun kaiba na sinda Senador Manny Pacquiao, Senador Panfilo Ping Lacson, dating Senador Bongbong Marcos, Moreno, Mayor Sarah asin an magiging pambato kan 1Sambayan na posibleng si Bise Presidente Leni Robredo.
Para man sa Bise Presidente kumpirmado ng madalagan si Presidente Rodrigo Duterte asin Senate President Vicente Sotto III.
Katakod kaini, abiso ni Prof. Carlos sa oposisyon, na sunodon an naenot ng suhestiyon ni Robredo na magkaigwa sana nin sarong pambato bilang Presidente asin Bise Presidente na matapat sa administrasyon, lalo pang nagtitinir na halangkaw an popularidad ni Presidente Rodrigo Duterte.
Para man sa mag bitante, pangapudan kan analyst na isentro an pagpili sa mga kandidato na may makusog na plataporma para sa salud, climate change asin edukasyon.
