Manito BFP, ipapa-otob an pinahigot na “Oplan kaluluwa 2025” ngonian na undas

LEGAZPI CITY – Preparado nang ipa-otob kan Manito Municipal Fire Station an pinahigot na “oplan kaluluwa 2025” katakod kan nagdadangadang na undas.

Segun ki Team Leader Senior Fire Officer III Mark Leron sa intrevista kan Bombo Radyo Legazpi na nakapagsagibo na man sinda nin ocular inspection sa sementeryo, terminal asin sa saindang mga firetrucks para man sa saindang information drive sa saindang banwaan.

Mantang nakatalaan man inspeksyunon kan saindang mga fire safety inspectors an mga stalls tiendahan asin mga lugar na paglulutuan sa palibot kan kamposanto nganing masyerto an kaligtasan kan publiko.

Pig-oobliga man ninda an mga stall-owners na magkaigwa nin fire extinguisher o maski balde nin tubig na harani sainda asin pigpapagirumduman an publiko na irayo an mga nakasinding kandila sa mga bagay na pwedesir masulo arug kan kurtina asin karton.

Pigtaram pa kan opisyal na magkakaigwa man nin malinaw na agihan palaog asin paluwas kan mga kamposanto nganing malikayan an stampede enkaso magruso na an mga mabisita sa saindang namaaram na mahal sa buhay.

Suhestyon niya man sa publiko na magbalon na sana nin pagkaon kaysa sa magluto sa mga sementeryo nganing malikayan an pagkakaigwa nin kasulo asin mabawasan man an mga basura alagad kun dae man malilikayan an kaipuhan na sana an pag-iingat.

Mahigot man nindang ipinagbabawal sa laog kan kamposanto an matarom na bagay, pagkakawat nin baraha o ano mang klase nin sugal, arak, pagsusulo nin basura, pagdadara kan mga flammable materials arug kan gasolina asin an pagtapok nin upos kan sigarilyo.

Pagdoon pa ni Leron na puga-puga na man an saindang koordinasyon bako sana sa Philippine National Police kundi pati na man sa Gobierno Lokal, asin volunteer organization nganing maparikas an saindang pagresponde sa mga dae piglalaomang insidente sa kasagsagan kan undas sa banwaan kan Manito.