LEGAZPI CITY-Nangapudan si Las Piñas Lone District Rep. Mark Anthony Santos sa mga social media companies na pakusugon an age verification, parental controls asin transparency sa saindang mga recommendation algorithms.
Hinagad man kan mambabatas sa Kongreso na repasuhon an mga eksistidong ley nganing mas responsable an mga plataporma sa mga nakakadanyar nacontent na nakakaabot sa mga kaakian.
Suportado ni Santos an paglimitar sa paggamit kan social media kan mga kaakian na wara pang 14 anyos asin mas mahigot na parental control sa mga nasa edad 14 hasta 17 anyos.
Nagpatanid man an mambabatas na nagigin mas dipisil para sa mga kaakian asin jovenes na likayan an nakakadanyar asin ilegal na comtent sa social media huli sa mga algorithm kan mga plataporma.
Susog ki Santos, an mga algorithm awtomatikong nagrerekomendar nin content basado sa kun ano an pighihiling, hinahanap asin pakikipag-ulay kan mga user.
Bilang resulta, an content manungod sa ilegal na droga, sugal, pornograpiya, kadahasan asin pagdanyar sa sadiri pwedisir na pauro-utrong maglataw sa mga screen kan mga menor de edad maski dai ninda ini tuyong pighahanap.
Sinabi man ni Santos na ginagamit kan mga sindikato nin droga an social media, fake accounts asin private messaging nganing maabot an mga jovenes.
Kabale digdi an inaapod na “dead drop,” kun saen an iligal na droga iwinawalat sa sarong lugar asin an recipient ipinapadara an lokasyon kaini sa paagi nin text message o retrato.
