LEGAZPI CITY-Nadiskubre sa sarong pag-aadal na an mayorya kan mga jovenes sa Australia naggagamit man giraray nin mga online platform.
Ini makalihis an tulong bulan na pagpapaotob kan Australia sa pagbabawal kan social media sa mga under 16 an edad.
Susog sa eSafety, an internet safety regulator kan Australia, dai nagin epektibo an lakdang asin kadakol na mga menor de edad an nag-a-access o naggigibo pa nin mga bagong account.
Nadiskubre man sa pag-aadal na an frequency kan paggamit kan social media kan mga kaakian na may edad 10 hasta 15, haros dai nagbago tulong bulan makalihis na ma-implementar an ley.
Mantang nagbaba an numero kan mga kaakian na igwa nin sadiring mga social media account, nagtetenir man liwat sa labing 80 porsyento an numero kan mga naggagamit nin mga plataporma arog kan YouTube, TikTok, Snapchat, Facebook, asin Instagram.
Bilang resulta, an gobierno kan Australia nagpapadagos kan saindang imbestigasyon sa nagkapirang mayor na mga tech companies para sa posibleng dai pagsunod sa bagong ley.
An Australia, iyo an pinakaenot na nacion na nagpataw nin nationwide ban sa social media para sa mga wara pang 16 anyos nganing maprotehiran an salud asin karahayan kan mga jovenes kan nacion.
