LEGAZPI CITY—Pinuonan na an send off ceremony kan mga kapulisan asin iba pang opisyal kan law enforcement agencies sa paagi kan programang “Maligayang Pasko sa Sorsogon Para sa Sorsoganon” sa provincia kan Sorsogon nganing maasigurar an matoninong asin ma-obserbaran an zero crime incident ngonian na Kapaskuhan.
Segun ki Sorsogon Police Provincial Office Public Information Officer Police Major Arwin Destacamento, sa intrevista kan Bombo Radyo Legazpi, saro ining inisyatibo kan gobierno provincial kan Sorsogon sa pangengenot ni Governor Edwin “Boboy” Hamor, asin sa pakikipagkoordinar sa Sorsogon Police Provincial Office, Provincial Disaster Risk Reduction Management Office, Bureau of Fire Protection, Bureau of Jail Management and Penology, Philippine Coast Guard, Philippine Army, magin an mga lokal na gobierno kan provincia.
Nakatalaan man na i-deploy an nasa 400 personahes durante kan selebrasyon kan Kapaskuhan kun sain may kanya-kanya sindang designated areas asin ma-duty nin 24 oras.
Dugang kan opisyal na mabugtak man sindang police assistance desks sa mga simbahan asin tourist spots sa saindang lugar.
Madurar suboot an nasabing deployment kan saindang mga personahes sagkod Enero 9, 2026.
Mientrastanto, nagtitinir na naka-full alert asin padagos an monitoring kan saindang opisina en kaso may na mga mairehistrong untoward incident sa kasagsagan kan holiday season.
