LEGAZPI CITY- Laoman na an mainit na debate asin tapok kan mga argumento sa magigin special session kan Kongreso sa aga, Hulyo 22 tangarig na pag-olayan kan mga lehislador an desisyon kun papalawigon o tatapuson na an Ley Martial sa Mindanao.
Mapuon an nasabing sesyon sa ganap na alas-nueve nin pagkaaga kun saen inimbitaran man sinda Defense Secretary Delfin Lorenzana asin mga representante hale sa Pwersa Armada kan Pilipinas asin intelligence unit tangarig na madiskutir an presenteng sitwasyon sa ciudad kan Marawi.
Pighihiling ni Ako Bicol Partylist Representative Alfredo Garbin Jr., pighihiling na kaini an magabat na pagkontra urog na kan mga nasa oposisyon siring man an pagkalkal sa mga napasong deadlines kan AFP sa pagtatapos kan giyera.
Posible man suboot na abuton nin hasta banggi an interpellation na pupunan makalihis an magigin report kan mga imbitadong personalidad na direktang nakakaaram kan krisis na kinakahampang kan mga apektadong residente.
Enot naman na nagpahayag nin kamawotan si Presidente Rodrigo Duterte na i-extend an martial law hasta sa pagtatapos kan taon alagad tinawang-duon man ni Garbin na bako an presidente an makakapagdeterminar kun papalawigon pa ini kundi an mga lehislador na nakatukaw sa Kongreso.
Sa ibong na lado, en kaso na dae tugutan na magpadagos an Ley Martial, automatically lifted na ini makalihis an Sabado.
