LEGAZPI CITY- Ipigkokonsiderar na dakulang trayumpo kan pinagsarong puersa kan Legazpi City Police asin Philippine Drug Enforcement Agency (PDEA) Bicol an pagkakaarestar kan tulong drug personality sa isinagibong implementasyon kan search warrant sa Brgy. San Roque.
Naaprehender si Michael Decano asin mga aki kaining sinda James asin Paul Michael Decano sa nasabing operasyon.
Sa intrevista kan Bombo Radyo Legazpi ki P/Supt. Aldwin Gamboa, hepe kan Legazpi City PNP, kinumpirmar kaini na kaibanan kuta an nasabing mga personalidad sa target kan One Time Bigtime Operations na ikinondukta sa mga barangay kan Penaranda, Sabang asin Victory Village alagad nahaloy-haluyan sana an pagbaba kan search warrant.
Kaibanan man an mga nasabing persona sa high value target (HVT) kan PDEA na enot nang nagsurendir sa irarom kan Oplan Tokhang alagad liwat na nagbalik sa iligal na transaksyon.
Dugang pa ni Gamboa na natapos pa kan tulo an Community-Based Rehabilitation (CBR) program na ipig-ofrecir kan lokal na gobierno.
Mientras tanto, narekober man sa nasabing operasyon an 27 gramo kan pigtutubudang shabu na igwang market value na P178, 000 asin ibang drug and non-drug paraphernalia.
Nakatalaan man na sunadan an mga ini nin kasong pagbayolar sa Section 11 kan Acta Republika Numerado 9165 o Comprehensive Dangerous Drugs Act of 2002.
