Legazpi City – Pigtawan aksyon kan Legazpi Government Unit asin kan mga telcos an mga nagkakalay kalay na mga wire o pig-aapod na “spaghetti wires” sa syudad.
Segun kay Legazpi City Mayor Alfredo Garbin Jr. sa intrevista kan Bombo Radyo Legazpi na nagkasararo sinda kan mga telcos asin kan Aleco nganing tanggalon an mga saindang wire na nagkakalay kalay partikular na sa sentro kan legazpi.
Piggibo an lakdang na ini nganing maibitaran an insidente nin mga nagsasarabit na mga wire sa mga truck na nagtataong peligro sa mga motorista asin publiko.
Pigtaram man kaini na nagkakawsa nin peligro sa mga kaharongan an mga wire nin huli ta pwede ining magin kawsa nin kasulo.
Pigdugang man ni Garbin na mga dae na man piggagamit asin wara nang pakinabang an mga nakolektang nagkakalay kalay na mga wire sa syudad.
Sa presente nasa drafting stage na sa Sangguniang Panglusod an kasuguan sa mga telcos manungod sa mga nagkakalay kalay na mga wire para sa ikakarahay kan lambang legazpeños.
Nagpapasalamat man ini sa mga turistang nagtatao nin kritisismo nin huli ta sa tabang kan saindang “constructive critisism” natatawan kan lokal na gobyerno nin aksyon saro saro an mga presenteng problema sa legazpi.
