LEGAZPI CITY – Ipighayag kan Legazpi City Public Safety Office na warang nanotarang kaso nin overpricing sa pasahe kan traysikel sa bilog na durasyon kan Palarong Bicol 2025.
Segun ki Legazpi City Public Safety Office head Octavio Rivero sa intrevista kan Bombo Radyo Legazpi na nagin maray an dalagan kan palaro sa ciudad huli ta wara sindang naresibi nin reklamo manungod sa overcharging asin pagpili nin pasahero.
Bunga suboot ini kan saindang pakikipag-olay sa mga presidente kan mga Tricycle Oweners and Drivers Association asin mga parada mapadapit sa pananamantala kan ibang driver sa mga turista asin bisita.
Maugma ini huli ta warang driver an nabaretaan nindang nambarat sa mga pasahero asin kun igwa man suboot an puro sana mga minor cases asin bako man konektado sa palaro.
Pigtaram man kan opisyal na back to normal na an saindang mga personahes huli sa pormal na pagtatapos kan palaro kasubagong aga.
Dae man sinda nagsagibo nin car clamping huli ta baka mga service vehicle kan mga delegado an saindang ma-clamp kun kaya nagdesignar na sana sinda nin mga parking areas sa palbito kan ciudad.
Hasta sa matapos an pakawat, wara man sindang namonitor na gabat nin trapiko sa gabos na kakalsadahan na harani sa mga playing venue asin biletting centers.
Nagpapasalamat an opisyal sa mga traysikel drivers sa ciudad huli ta pinagbigyan kan mga ini an paki-olay ninda na dae pagsamantalahon an mga bisita sa ciudad asin nagmamawot na dae na mauutro an mga kaso kan overpricing kan mga ini.
Mientrastanto, nakabantay man an Legazpi City PSO sa mga lugar na pigsasagibuhan nin mga manlain-laing proclamation rally katakod na man kan pagpopoon kan campaign position sa 2025 midterm election.
