LEGAZPI CITY—Pighayag kan Philippine Institute of Volcanology and Seismology na pwedesir pang maghalaba an distansya kan lava flow o pagbulos kan lava kan bulkang Mayon makalihis an padagos na aktibidad kaini.
Segun ki PHIVOLCS Monitoring and Eruption Prediction Division Chief Mariton Bornas, sa intrevista kan Bombo Radyo Legazpi, na kun magpapadagos an lava effusion sa bunganga kan bulkan an pwedesir pang maghalaba an presenteng naire-record nindang pinakahalabang pagbulos nin lava sa Basud gully na nag-aabot sa haros 4 kilometer.
Saro sa mga pighalimbawa kan opisyal an nangyari kan taong 2006 na kun sain naglagpas sa 6 kilometer radius an pagbulos kan lava sa Bonga gully kaya may posibilidad na maghalaba ini kun magpadagos pa an aktibidad kan bulkang Mayon.
Basado man sa kalkulasyon kan saindang grupo na naglagpas na sa 29 million cubic meters an nailuluwang lava kan bulkan, alagad pagdoon niya, na bako gabos kaini an maaanod kan uran huli sa an iba sa lava flow an nagigin solid rocks na dae naaanod kan uran.
Mientrastanto, wara pa man na nahihiling an ahensya nin mga indikasyon na magkaigwa nin signipikanteng pagbabago sa ugali o aktibidad ka nasambitang bulkan.
