LEGAZPI CITY—Arestado an sarong lalaki sa kinundusir na buy-bust operation kan mga otorida sa Barangay San Isidro Village, Virac, Catanduanes.
Segun ki Catanduanes Police Provincial Office Public Information Officer Police Major Emsol Icawat, sa intrevista kan Bombo Radyo Legazpi, binisto an suspek na sarong 25-anyos asin residente kan nasambitang lugar.
Nakumpiskar digdi an nasa 50 gramos nin pigtutubudang shabu na nagkakantidad nin labi P350,000.
Dugang kan opisyal na naarestar ini sa pinagsarong operatiba kan Virac Municipal Police Station, Regional Police Drug Enforcement Unit 5 asin Provincial Intelligence Unit Catanduanes.
Pigkonsiderar na street level individual an suspek kun saen kabale ini sa newly identified drug personalities.
Mientrastanto, pangapodan man kan opisyal sa publiko na magin mapagmatyag sa palibot asin ipagtaong aram sa mga kapulisan o sa barangay en kaso man na may ma-obserbaran man na kaduda-dudang hiro sa saindang lugar.
