LEGAZPI CITY—Wara nang buhay kan madukayan kan mga otoridad an sarong lawas kan senior citizen sa bakawan sa Barangay Bagatabao, Bagamanoc, Catanduanes.
Segun ki Bagamanoc Municipal Police Station Municipal Community Affairs and Development Police Non-Commissioned Officer Police Staff Sergeant Joel C. Villarete, sa intrevista kan Bombo Radyo Legazpi, nakua an lawas kaini sa irarom kan salog kan nasabing lugar.
Basado sa saindang imbestigasyon, na nagpapastol ini nin karabaw asin nagbalyo sa salog alagad huli kan makusog na hukol an dae na niya na ini kinaya.
Nagsapo man suboot an biktima nin mga pasa sa saiyang lawas huli man sa posible ining nakatama sa mga corals sa nasabing lugar.
Dugang kan opisyal na pagkalamos an nagin kawsa kan pagkagadan kan biktima basado sa autopsy kan doktor asin wara man sindang nahiling na foul play.
Nagpagiromdom man si Villarete sa publiko na dae magsolo en kaso magpasiring sa mga hararayong lugar nganing malikayan an siring na insidente.
