Irido an sarong lalaki makalihis na saksakon kan sarong motorista na saiyang sinita huli sa paggamit nin open muffler exhaust system na nagkawsa nin dakulang ribok sa Barangay Lawaan, Roxas City.
Binisto an biktima na si alyas ‘Norman’, nasa tamang edad asin residente kan nasabing lugar mantang inisto an mga suspek na sinda “Josh” asin “Nick”.
Sa entrevista kan Bombo Radyo ki Police Major Marvin R. Balmes, Deputy Chief of Police kan Roxas Component City Police Station, sinaysay kaini na mantang nagpapahingalo an biktima sa saindang garahe, may nag-agi na motorsiklo sa mga motorista na nagkawsa nin dakulang ribok asin nakadisturbo sa saiyang pahingalo.
Sinita kan biktima an mga suspetsado huli sa ribok.
Segun sa biktima, dae siya inintindi kan suspetsado alagad makalihis an pirang minuto, nagbalik sinda na may darang sundang asin bigla na sana ining sinaksak.
Nagsapo nin lugad sa saiyang payo, tagiliran, asin takyag an biktima na tulos idinalagan sa Roxas Memorial Provincial Hospital nganing ipabulong.
Mientrastanto, marikas man na nagdulag an mga suspek makalihis na gibohon an insidente.
Padagos an pigkokondusir na imbestigasyon kan mga otoridad ngani na maaraman an address kan mga suspek asin magsangat nin magkakanigong kaso kontra sa mga ini.
