Gadan an sarong lalaki makalihis na atakihon an embahada kan Israel sa Belgrade, Serbia gamit an pana.
Segun sa mga otoridad, bigla na sanang nagrani an suspek asin pinana an pulis na nakabantay sa embahada.
Tinamaan sa liog an pulis na tulos na nakagabot nin badil asin pinaputokan an suspek.
Marikas man na naidalagan sa ospital an biktimang pulis na nasa maray na ngunyan na kondisyon mantang binawian nin buhay an suspek.
Bako pang malinaw sa ngunyan kung ano an posibleng motibo kan suspek alagad napag-araman na nagribay ini nin relihiyon bilang Muslim antes na isagibo an pag-atake.
Pinag-aaram naman kan mga otoridad kung may iba pang persona an imbwelto sa nasabing pag-atake.
