LEGAZPI CITY-Ibinuyagyag ni Department of Agriculture (DA) Secretary Francisco Laurel Jr. an pagkaka-imbuelto kan labi sa 20 na mga pribadong kumpaniya sa mga serye kan rice smuggling sa Pilipinas.
An mga nasambitang kumpaniya, nanotaran an huli sa mahigot na kolaborasyon sa pagultangan kan Department of Agriculture, Bureau of Customs (BOC), asin Philippine National Police (PNP).
Sa presente, anom sa sainda an nasangatan na nin kaso.
Sinabi man kan kalihim na madali an pagsasangat nin kaso laban sa mga darakulang kumpanya, orog na nalilimitahan an mga food safety issues.
Nakikipag-kolaborasyon an ahensiya sa Bureau of Customs (BOC) para sa pagsasangat nin dagdag na kaso siring kan smuggling.
Mientrastanto, nanotaran man kan ahensiya an nagkapirang customs broker na pinakaenot na imbuelto sa pagpuslit kan mga agri products, siring kan mga bagas.
Nagpapadagos man suboot an imbestigasyon laban sa mga broker para sa makakanigong kaso.
