LEGAZPI CITY-Nagrapado na sa 160 katawo an kumpirmadong nagadan asin ginatos an nawawara pagkatapos kan darakulang biglaang pagbabaha na nag-agi sa mga baryo sa Nepal asin sa linderos kaini sa Tibet.
Susog sa Ministry of Tourism kan Nepal, mga 403 na turista asin 341 sainda mga dayuhan hale sa manlaen-laen na nacion, asin 28 na mga pulis an nawawara pa.
Mientrastanto, an mga otoridad kan China nagsabi na tulong tawo an nagadan asin 265 an nawawara sa saindang lado kan linderos sa Gyirong county sa Tibet pagkatapos na maputol an komunikasyon, kuryente, asin kalsada huli sa matinding mudslide.
An nasyunal na suplay nin enerhiya kan Nepal, tinamaan man nin mahiwas na danyos pagkatapos na maraot kan pagbabaha an 430 Megawatts na kapasidad nin kuryente gikan sa mga pasilidad kan hydropower asin solar.
Huli sa matinding danyos asin halangkaw na lebel kan tubig, an nagapod nin pagkakasararo si Nepal Prime Minister Balendra Shah mantang naghahagad man nin tabang sa mga kataraid na nacion siring kan India asin China para sa pag-ebakwar asin paghahanap sa mga biktima.
An Nepal Army asin mga rescue team gikan sa manlaen-laen na sektor naglansar na nin mahiwasang mga operasyon sa paghanap asin pagresponde gamit an mga helikopter asin mga espesyalisadong yunit nganing tabangan an mga residente na na-trap sa nasabing trahedya.
