Nakapagrehistro an Department of Health (DOH) nin kabilugan na 4,600 na bagong kaso kan human immunodeficiency virus (HIV) sa nacion sa enot na tulong bulan kan 2026.
Basado sa pinakahuring datos kan HIV and AIDS Surveillance of the Philippines, uminabot sa 4,633 bagong HIV cases an nairehistro puon Enero hasta Marso ngunyan na taon, na nasa 9% na mas halangkaw kumparar sa parehong panahon kan nakalihis na taon.
Sa kabilugan, sinabi kan ahensya na 1,104 o 24% kan mga bagong kaso an nasa advanced HIV stage na kan sinda an ma-diagnose.
Uminabot sa average na 51 kaso kada aldaw an nairehistro sa nasabing quarter.
Mas hibaba ini nin 11% kumparar sa 57 daily cases na nairehistro sa kaparehong panahon kan 2025.
Mientras tanto, an average monthly cases an nasa 1,544 na mas hibaba man nin 9% kumpara sa 1,693 monthly cases kan nakalihis na taon.
Pinakahalangkaw an numero kan mga bagong kaso sa National Capital Region (NCR) na igwang 989 infections, pigsusundan kan Calabarzon na igwang 808, Central Luzon na may 551, Soccsksargen naigwang 277 kaso asin Davao Region na igwang 263 kaso.
Kadaklan sa mga bagong kaso an kalalakihan, kun sain 4,381 an lalaki mantang 252 an kababaihan.
An edad kan mga bagong kaso an puon 2-anyos hasta 77-anyos.
