Labi 2,000 na katawo an nailubong nin buhay sa sarong remote village sa Papua New Guinnea kawsa kan dakulang landslide.
Basado ini sa report kan national disaster center kan nasabing nacion sa United Nations.
Nangyari an landslide kun sain nagrasay an parte kan Mount Mungalo sa Enga province rason ngani na matahuban an mga kaharongan magin an mga tawong nagkakaturog pa sa mga oras kan mangyari an insidente.
Dagos-dagos pa an pigigibong operasyon ngani na maisalbar an mga biktima kun sain tabang-tabang an mga otoridad asin mga residente.
Segun ki United Nations migration agency official Serhan Aktoprak, padagos pa an pagbagsak kan nagkapirang mga debris hali sa bulod.
Kaibanan na digdi an padagos man na pagbulos kan tubig pababa hali sa bulod na pwedeng magkawsa pa nin pagbagsak kan mga daga.
Pigtutubudang huli sa nagkapirang semana na pag-uran an kawsa kan nasabing matinding landslide sa lugar.
