LEGAZPI CITY-Nagdeklara nin state of emergency an Los Angeles County bilang tugon sa padagos operasyon kan gobierno ngani dakupon asin pahalion an mga iligal na imigrante sa Estados Unidos.


Ipigbubusol ini ni County Supervisors Lindsey P. Horvath asin Janice Hahn, na naaprubahan na sa paagi kan botohan na may resultang 4-1.


An deklarasyong ini an nagtatao nin kapangyarihan sa lokal na gobierno ngani magtao nin tabang sa mga residenteng apektado, orog na sa aspeto kan pinansyal huli sa mga operasyon kan Immigration and Customs Enforcement (ICE).


Pigkakarkulong may labi sa 3 milyong imigrante an nagtetenir suboot sa Los Angeles, asin an agresibong lakdang kan immigration an nagreresulta nin matinding takot sa komunidad.


Nabawasan man suboot an trabaho sa lugar, naapektaran an ekonomiya, asin nabulabog an mga serbisyong pampubliko siring kan mga eskwelahan, ospital asin an simbahan.


Mientrastanto, pigsierto man ni County Supervisor Lindsey P. Horvath na padagos na pigsusuportaran kan lokal na gobierno an mga imigrante hasta sa mawara an peligro sa saindang kaligtasan.


Magigin epektibo man an deklarasyon hasta sa opisyal na ining bawion kan konseho.