LEGAZPI CITY – Dae na suboot kaipuhan na magrequest sa Bureau of Fire Protection (BFP) Legazpi an sarong lugar para sa decontamination efforts na igwang nairehistrong kumpirmadong kaso kan coronavirus disease (COVID-19).
Siring kan ginibo sa Brgy. 13 Ilawod West, Brgy. 8 Bagumbayan asin iba pang pagtaraid na lugar, otomatiko na suboot na masagibo kan disinfection sa komunidad.
Alagad sa ngonyan, nagbawas nin fire trucks na pigagamit sa misting an BFP asin duwa na sana an nag-ooperate makalihis na mapaapudan an atensyon kan national office.
Sinabi ni City Fire Marshall FS/Insp. Garry Lunas sa intrevista kan Bombo Radyo Legazpi, pinaghalong tubig asin chlorine an pigagamit sa pag-decontaminate na “corrosive” asin makakaraot sa mga ekipahe.
Huli ta warang makina na gagamiton sa operasyon, awto nin bumbero na muna an kinua. Nanindogan man an BFP na nangangaipo nin tabang sa ngonyan an mga kahimanwa kun kaya an duwang lumang firetruck na muna an ipinapagamit.
Makalihis na matapos an duwang disinfection operations sa mga lugar na naapektaran kan lockdown, wara man na specific barangay na imi-misting an mga ini alagad target na maabot an gabos na komunidad.
Inasegurar man ni Lunas, nagsusunod sa prescribed formula kan DOH an pigagamit na kemikal sa misting.
