LEGAZPI CITY – Nakatalaang magsagibo nin mahiwasang prayer rally an mga katolikong suportadores ni former Albay Governor Noel Rosal sa Ligao City.
Magigirumduman kaya na ibinasura kan Commision on Election En Banc an motion for reconsideration kan dating gobernador sa kandidatura kaini sa paparaning pirilian.
Segun kay Diego Obido, saro sa mga kandidato kan Rosal Team sa intrevista kan Bombo Radyo Legazpi na bako ini plano kan saindang grupo kundi plano kan mga katolikong suportado kan Diocese of Legazpi an nasambitang aktibidad.
Hahagadon suboot kan mga ini sa kagurangnan na tugutan kan korte suprema na makapagpili an mga Albayano kan mawot nindang gobernador nin huli ta wara nang pagpipilian an mga botante sa provincia enkaso dae tugutan na makadalagan an dating gobernador.
Nagmamawot man ini na makapagpaluwas na nin Temporary Restraining Order an korte bago mag Enero 13 nganing dagos pang makadalagan komo gobernador si Rosal asin ipagkaloob na suboot sa mga botante an libertad na makapagpili nin huli ta karapatan man ninda ini bilang sarong albayano.
Pigklaro man ni Obido na warang kasuguan an saindang grupo na maghakot nin mga maiba sa rally kundi saro ining boluntad na aktibidad.
Kun siya suboot an hahaputon, pigngalasan kaini an marikas na desisyon kan Comelec en banc na ibasura sa laog sana nin duwang aldaw an motion for reconsideration kan dating gobernador.
Korte suprema na sana suboot an saindang piglalaoman nganing wara nang ulang sa kandidatura ni Rosal.
