Nagsumiter na an Philippine General Hospital (PGH) sa Sandiganbayan nin medical examination report ni dating House Speaker Martin Romualdez na nahahampang sa nonbailable na kasong plunder.
Gagamiton an report sa pagtukoy kun kaipuhan pang magtinir ni Romualdez sa PGH o pwedesir na siyang ilipat sa New Quezon City Jail sa Payatas, kung saen nakakulong an iba pang imbuelto sa flood control scam.
Piglalaomang mahampang sa Sandiganbayan ngunyan na Lunes si PGH Director Dr. Gerardo Legaspi o ang saiyang kinatawan nganing ilahad ang resulta kan independent medical examination asin kun may importanteng pangangaipuhan pa nganing palawigon pa an confinement ni Romualdez sa ospital.
Mientrastanto, sinabi an Bureau of Jail Management and Penology (BJMP) na tulos kaining ililipat si Romualdez sa Quezon City Jail en kaso isugo kan Sandiganbayan asin ideklarang fit na siya para sa transfer.
Kun matinir sa PGH, padagos na babantayan kan BJMP an dating House speaker sa laog asin luwas kan saiyang private room, siring man an palibot kan ospital.
Segun ki BJMP Spokesperson Jail Supt. Rex Bustinera, wara sindang na-monitor na huma ki Romualdez asin nagtitinir na normal ang security situation puon kan mapasairarom siya sa saiyang kustodiya kan Huwebes.
Dinara si Romualdez sa PGH hale sa Cardinal Santos Medical Center sa San Juan City kan Sabado nganing magsairarom sa pagsusuri makalihis magluwas nin arrest warrant laban saiya.
Si Romualdez, 62-anyos, an nahahampang sa P7.4-bilyong plunder case na isinunad kan Office of the Ombudsman laban saiya asin tulo pang indibidwal katakod kan suboot kickback scheme sa mga flood control project.
