LEGAZPI CITY — Aminado an Philippine Navy na kulang pa an kapasidad kan Pilipinas pag-abot sa mga amphibious operations kumpara sa ibang mga nasyun.
Segun kay Major Naval Inspector General Nathaniel Casem, kulang man giraray an mga ekipahes kan nasyun maging an mga eksperyensya kan personahes para sa nasabing operasyon.
Ginibo kan opisyal an pahayag durante kan pigsasagibong Exercise Pagsisikap 2018 sa kadagatang sakop kan ciudad nin Legazpi.
Segun kay Casem, importante an siring na exercisee nganing matraining pa an saindang pwersa sa pagresponde sa mga emerhensya na nangyayari sa kadagatan.
Ibinida man kan opisyal an duwang amphibious assault vessels kan Philippine Navy na BRP Tarlac asin an BRP Davao Del Sur mantang pinaglalaoman man an pag-abot pa kan apat na kaparehong sakayan sa masunod na taon.
Mientras tanto, nagpaabot man nin pasasalamat an opisyal sa gobyerno huli sa padagos na pagtataong suporta sa navy.
