Pinonan na kan Kamara de Representantes an mga pagdangog sa propuestong P6.793-trillion national budget para sa masunod na taon na isinumiter ni Presidente Ferdinand “Bongbong” R. Marcos Jr. sa Kongreso ngonian na aldaw nin Lunes, Agosto 18, 2025.
Sa enot na pormal na pagtiripon kaini, an House Committee on Appropriations makakaresibe nin briefing gikan sa mga miembros kan Development Budget Coordination Committee (DBCC) manungod sa estado kan ekonomiya kan nasyon asin an mga macro-economic assumptions na ginamit kan administrasyon sa pagbilog kan propwestong budget para sa 2026, na bisto bilang National Expenditure Program (NEP).
Piglalaoman na sasabaton ni Speaker Ferdinand Martin Romualdez an mga miembros kan DBCC sa House hearing na papangenotan kan chairperson kan appropriations panel na si Nueva Ecija Rep. Mikaela Angela “Mika” Suansing.
Magkakaigwa nin briefing si Budget Secretary Amenah Pangandaman, Economic Planning Secretary Arsenio Balisacan Jr., Finance Secretary Ralph Recto, asin Bangko Sentral ng Pilipinas Gov. Eli Remolona Jr.
Pigdoon ni Speaker Romualdez an saiyang promesa na magiging transparent asin inclusive an budget deliberations, asin masunod ini sa mga repormang pigpapautob kan Kamara sa proseso kan pagpasar asin pag-implementar kan national budget.
Sinabi pa niya na an NEP saro man na repleksyon kan mga spending priorities ni Presidente Marcos para sa Bagong Pilipinas.
Enot na pigbuyagyag ni Speaker Romualdez an mga budget reforms na pinonan kan Kamara para sa budget deliberation.
