LEGAZPI CITY-Tinawan doon kan grupo nin mga obrero na ipapadagos ninda an pagbusol kan P200 taas-sahod ngani maipasar na ini.
Segun kay Kamanggagawa Partylist Rep. Eli San Fernando, sa intrevista kan Bombo Radyo Legazpi, haloy nang pigbubusol ninda an pantay na sahod sa Metro Manila asin sa mga probinsya.
Sinabi pa niya na iligal asin igwang implikasyon an ipinaluwas na Temporary Restraining Order (TRO) sa wage hike sa NCR na posibleng igwang epekto sa Regional Wage Orders.
Nakabinbin pa suboot hasta ngonian sa Kamara an House Bill No. 8081 na obhetong buwagon an provincial rate sa nacion.
Punto pa ni Fernando na dai niya masabutan an mga tutol sa bill huli ta dai ninda aram an pamumuhay sa provincia asin haros parehas man sana an mga presyo digdi kumparar sa Metro Manila.
Alagad, hasta ngonian nasa P455-P480 man liwat an minimum wage orog na sa sa Bicol Region.
Duwang mayor na bill an nakabinbin ngonian sa Kamara, kun sain enot na an legislated wage increase na P200 para sa bilog na nacion, na pasado na sa 19th congress.
Ikaduwa an provincial rate na haros 200 na mababatas na an nagpirma asin pasado an sa komite kan Pebrero 2026.
Sinabi kan opisyal na nakabinbin an mga ini huli ta bako suboot prayoridad kan administrasyong Marcos asin pighaharangan mismo kan house majority leader kun kaya dai naghihiro an mga nabanggit na bill ngani mapag-debatehan asin pag-botohan na sa plenaryo.
