LEGAZPI CITY-Nagluluwas dokumento kan United States Department of Justice (DOJ) na suboot nag-hire an nagadan na sex offender na si Jeffrey Epstein nin sarong team na naka-base sa Pilipinas ngani burahon asin takupan an mga negatibong impormasyon tungkol sa saiya sa internet.
Basado sa mga dokumentong nakuwa kan Estados Unidos, kabale an mga email exchange ni Epstein asin ni Al Seckel, na agom kan tugang ni Ghislaine Maxwell—an dating katuwang asin pangenot na katuwang ni Epstein sa paghahanap kan mga menor de edad.
Si Maxwell nahatulan man kan taong 2021, kasunod kan sex trafficking crimes ni Epstein.
Sa mga email, iniladawan ni Seckel an sarong organisadong kampanya ngani maitago suboot an mga krimen ni Epstein sa online search results, kabale na digdi an paggibo nin mga positibong link mapadapit kay Epstein.
Sa saro pang email kan Disyembre 7, 2010, sinabi ni Seckel kay Epstein na natanggal na suboot sa Google search suggestions an mga terminong “Jeffrey Epstein jail” asin “Jeffrey Epstein pedophile,” na pigtatrabaho suboot kan sarong Philippine-based team.
Segun sa U.S. DOJ documents, nakagibo an grupo nin kadakol na website asin web pages na nagpapahiling kay Epstein bilang sarong philanthropist, nag-popondo kan mga project na may kinaraman sa Science asin Sports.
Naaraman man sa mga pages an pigmanipula an resulta kan mga search engine huli sa rinibong links.
Marurumduman na si Jeffrey Epstein, inarestar kan 2019 sa kasong sex trafficking asin pang-aabuso sa mga menor de edad sa US asin iba pang nacion.
Siya nagadan mantang nakakulong sa New York jail kan parehong taon habang pighahalat an saiyang paglilitis.
