LEGAZPI CITY – Inagyat kan sarong Bicolanong kongresista na porbaran kan Metro Manila Development Authority (MMDA) sa dry run kan provincial bus ban kun talagang mababawasan an traffic sa EDSA.
Sa intrevista kan Bombo Radyo Legazpi ki Ako Bicol Party-list Rep. Alfredo Garbin Jr., kun dae kaya suboot maotob an mas maray nang abandonahon na an polisiya.
Direkta pang sinabi ni Garbin na kapritso sana man an nasabing polisiya.
Dugang pa kan lehislador na nagsunad naman nin kaso sa Korte Suprema kontra digdi asin na-raffle na kasabay kan pag-file nin urgent motion para sa Temporary Restraining Order (TRO) sa lakdang kan MMDA.
Tinawang-duon man kaini na warang direchos an MMDA asin solamenteng Land Transportation, Franchising and Regulatory Board (LTFRB) sana an may poder sa paghali kan permit asin prangkisa kan mga provincial bus terminal.
Wara man suboot na karapatan an mga ini na ipasarado an sarong terminal urog na kun warang nakomiter na sala.
