Kinumpirmar kan Iran-aligned Houthi group sa Yemen na saindang inatake an Jazan refinery kan Saudi Aramco kan Domingo, nagkapirang aldaw makalihis nagpirma an Saudi Arabia sa sarong defense pact kaibanan an Turkey asin Pakistan.
Segun sa Houthi military spokesperson na si Yahya Saree, guminamit sinda nin drone ngani na targeton an refinery sa Jazan, southwestern Saudi Arabia.
Inihayag man kan Saudi Energy Ministry na nagkaigwa nin kasulo sa refinery alagad tulos man ining naapula asin wara man na nakulugan sa insidente.
An Jazan refinery an igwang kapasidad na magproseso nin hasta sa 400,000 barrels nin crude oil kada aldaw asin dati na man na naging target kan mga pag-atake kan nasabing mga rebeldeng grupo.
Afuera sa Saudi Arabia, sinabi man kan Houthis na nagsagibo na man sinda nin missile asin drone attacks kontra sa Mocha, sarong Yemeni Red Sea port city.
Basado sa report kan Reuters, pinapaputukan nin air defenses an mga drone na target suboot an commercial quay asin storage facilities kan port.
Marurumduman na enot na nagdeklarar an Houthis nin naval blockade kontra sa Saudi Arabia sa Red Sea, na pigkokonektar sa sinasabing blockade kan Riyadh kontra sainda, na pinahimutikan man kan Saudi government.
