LEGAZPI CITY-Nanindugan an House prosecution na dai pwedisir ikonsiderang “discredited witness” si dating Davao police officer Arturo Lascañas huli ta pinaliwanag niya sa saiyang sinumpaang salaysay kun nata pignegaran niya an mga alegasyon sa saiyang enot na pagtestigo sa pagdangog kan Senado kan 2016.
Segun kay House prosecution legal spokesperson Atty. Benjamin “Jay” Tolosa Jr., sinabi ni Lascañas sa saiyang ikaduwang affidavit na na-coach suboot siya kan nagkapirang opisyal ngani itanggi an mga alegasyon katakod kan suboot Davao Death Squad.
Sinabi pa niya na kalaunan binawi ni Lascañas an saiyang naenot na pahayag huli sa saiyang konsensya asin pangamba para sa saiyang kaligtasan.
Tinawan doon ni Tolosa na bako otomatikong nawawaran nin kredibilidad an sarong testigong nagbabago kan salaysay.
Tinukoy man niya an testimonya kan NBI na nagsasabing an pag-recant kan sarong testigo, dapat busisihon basado sa kada kaso.
Nilinaw man kan prosekusyon na dai ninda inihampang an affidavit ni Lascañas ngani patunayang totoo an mga alegasyon kaini, kundi bilang parte kan mga dokumentong pigkokonsidera kan National Bureau of Investigation (NBI) sa pagbusisi sa suboot banta laban kay Presidente Ferdinand Marcos Jr.
Mientras tanto, sinabi man ni impeachment adviser asin trial spokesperson Robert Ace Barbers na bako posibleng basta isantabi an affidavit ni Lascañas huli ta malinaw kaining ipinaliwanag an rason kan saiyang pagbabago kan salaysay.
Tinawan doon man kan prosecution na an affidavit ni Lascañas, parte sana kan kabilugang ebidensiyang ihahampang asin an Senate impeachment court man liwat an magdedesisyon sa gabat asin importansya kan gabos na ebidensiyang nasa rekord.
