LEGAZPI CITY – Nakisabay an grupo nin mga paratukdo sa isinagibong fishing expedition sa West Philippine Sea bilang parte kan protesta kontra sa mga panghaharass kan China.
Sa intrevista kan Bombo Radyo Legazpi kay Vladimer Quetua an Chairperson kan Alliance of Concerned Teachers, kasabay kan saindang grupo an mga miyembro kan Pambansang Lakas ng Kilusang Mamamalakaya ng Pilipinas na naglunad sa mga bangka asin nagbiyahe pasiring sa West Philippine Sea.
Kasabay man sa ekspidisyon si Alliance of Concerned Teachers partylist Representative France Castro na personal na pighiling an mga aktibidad kan barko kan China.
Aminado si Quetua na nahahandal para sa saindang seguridad lalo pang nagkapirang beses ng nambobomba nin tubig an barko kan China Coast Guard sa mga barko kan Pilipinas na napapasiring sa nasabing parte kan kadagatan.
Idagdag pa diyan an naging huma kan China na aarestaron an mga malaog sa West Philippine Sea asin masuway sa ipinaotob na fishing ban.
Sa ibong kaini, nanindugan an grupo na wara nin sala sa saindang ekspidisyon lalo pang parte kan teritoryo kan Pilipinas an nasabing kadagatan asin dae nin deretso digdi an China.
