LEGAZPI CITY- Aminado an nagkapirang grupo nin mga paratukdo na igwang mga insidente na nakakaabot nin higher level an sarong estudyante na maluya pa magbasa asin nadidifisilan pa sa basic arithmetic.
Ini an kasunod kan pag-kwestyon ni Senator Nancy Binay na dakol na estudyante an nakaka tungtong sa higher grade level na dae tataong magbasa o magbilang.
Segun ki Teacher’s Dignity Coalition Chairman Benjo Basas sa intrevista kan Bombo Radyo Legazpi na an ibang mga paratukdo an nagtatao nin konsiderasyon.
Paliwanag kaini na dakol na mga konsiderasyon an pigtatao sa mga estudyante kaya igwang mga nakakapagtapos nin elementarya maski pa maluya sa klase.
Katakod kaini, nangapudan an opisyal sa publiko na ibitaran man an pagbabatuhan nin basol sa tahaw kan kamawotan na learning recovery.
Segun ki Basas na kinakaipuhan na hilingon an pangkabilugan na sitwasyon siring na sana kan social background kan sarong estudyante na nagigin ulang sa pagkanuod kaini.
Dapat man suboot na aramon an mga bagay na dae naitatao kan sistema kan gobierno asin bako sana an pagkukulang kan paratukdo.
