LEGAZPI CITY—Arestado an sarong empleyado kan gobierno na nasa listahan bilang sarong high-value individual sa kinundusir na anti-illegal drug operation sa Barangay Calatagan Tibang kan banwaan nin Virac, Catanduanes.
Binisto an nasabing indibidwal na si alyas “Dino,” 58-anyos, residente kan nasabing banwaan, asin empleyado kan National Irrigation Administration (NIA).
Nakumpiskar digdi an nasa apat nin heat-sealed transparent plastic sachets na pigtutubudang shabu, kun sain may gabat ining nasa 22.45 gramos asin estimated Standard Drug Price na P152,660. Nakumpiskar man digdi an pirang non-drug items na may kinaaraman sa ginibong operasyon.
Kinundusir an operasyon kan Regional Police Drug Enforcement Unit 5, Virac Municipal Police Station, Catanduanes Police Provincial Office Provincial Intelligence Unit, Philippine Drug Enforcement Agency (PDEA) Catanduanes Provincial Office, asin PDEA Regional Office 5.
Sa presente, dinara na ini sa Virac MPS magin an mga nakumpiskar na ebidensya para sa makakanigong disposisyon.
Basado man sa datos kan Criminal Information Reporting and Analysis System asin e-Rouge, dati nang may record an suspek sa pagbalgar sa Republic Act No. 9165 o Comprehensive Dangerous Drugs Act of 2002, na may petsang June 14, 2016.
