Manlaen-laen na sectoral groups an nagsangat nin reklamo sa Office of the Ombudsman ngonian na aldaw laban sa nagkapirang dating opisyales na imbuelto sa isyu nin maanomalyang flood control projects.
Sa pag-abot kan mga grupo kabali na si Kilusang Bayan Kontra Kurakot, Bagong Alyansang Makabayan asin iba pa, partikularmenteng pigreklamo ninda si dating Undersecretary Adrian Bersamin, asin dating Department of Education Usec. Trygve Olaivar.
Sigon ki David San Juan kan Kilusang Bayan Kontra Kurakot, an saindang pagsangat nin reklamo sa Tanod-bayan iyo an pagpanimbag sa sainda.
Kun saen pighagad ninda sa Ombudsman na imbestigaran an mga posibleng pagbalgar kan ‘Code of Ethics of Public Officials’, Anti-Graft and Corrupt Practices Act o Republic Act No. 3019 asin grave misconduct.
Pigpaliwanag kan nagrereklamo na saro sa mga basehan kan pagsangat kan reklamo iyo an manungod sa mga pahayag na ginibo ni dating Ako Bicol Party-list Rep. Zaldy Co asin dating Department of Public Works and Highways Undersecretary Roberto Bernardo.
Tinawan doon ni Chairperson Teddy Casiño kan Bagong Alyansang Makabayan na senyales an saindang pagsangat kan reklamo na dae pa nalingawan kan publiko an isyu kan kurapsyon sa flood control.
Nanindugan ini na dapat mag-imbestigar asin mag-aksyon an Office of the Ombudsman huli ta konektado sa Palasyo nin Malacañang an mga reklamo, partikularmente ki Presidente Ferdinand ‘Bongbong’ Marcos Jr.
