Ipigbuyagyag ni Senate President Pro Tempore Panfilo “Ping” Lacson na si dating DPWH Secretary Manuel Bonoan an nakaresibe suboot nin handwritten “memos” hali sa mga sibilyan o bako empleyado kan ahensya dapit sa mga proyektong kaipuhan na aprobaran.
Sinabi ni Lacson na saro sana ini sa serye nin mga iregularidad na nagluluwas sa imbestigasyon kan Senado dapit sa flood control asin infrastructure projects kan gobyerno.
Segun sa senador, posibleng pahiwason pa kan Blue Ribbon Committee an imbestigasyon ngani na maibale an iba pang proyekto arog kan farm-to-market roads, huli sa pauru-utrong korapsyon sa DPWH.
Ipig-anunsyar man ni Lacson na sa masunod na Blue Ribbon hearing sa Nobyembre 14, may ipapa-apod sindang “importanteng testigo” na posibleng mag-dawit nin ibang pangaran, kabale na an nagkapirang opisyales kan gobierno.
Plano man kan komite na ipaapod sa retired Technical Sergeant Orly Guteza, na nagsabing naghatod siya nin mga maleta nin kwarta sa mga harong ni dating Rep. Elizaldy Co asin dating Speaker Martin Romualdez, na sarong alegasyon na pinahimutikan ni Romualdez.
Dugang pa ni Lacson, maski nagtetenir na valid an testimonya ni Guteza, posibleng maapektaran an saiyang kredibilidad makalihis na madiskubre kan korte an mga iregularidad sa saiyang notarized affidavit.
