LEGAZPI CITY-Sinabi kan kampo ni Vice President Sara Duterte na ma-monitor sana sinda sa plenary deliberations kan Kamara de Representantes ngonian na aldaw nin Lunes, mantang nakatakdang mag-boto an mga kongresista sa impeachment case laban sa bise presidente.
Segun kay Atty. Michael Poa, tagapagtaram kan legal defense team ni VP Sara, dai pa sinda pisikal na maatendir sa plenaryo, imbes maantabay sana kan magigin resulta kan botohan.
Sinabi man niya na dai sinda matao nin spekulasyon kun maaabot an kaipuhang 1/3 o 106 votes hale sa 318 na miyembro kan Kamara ngani maipasar an Articles of Impeachment sa Senado.
An impeachment complaint, nakabase sa pinagsarong reklamo na isinangat nina Fr. Joel Saballa asin Atty. Nathaniel Cabrera.
Kaiba sa mga alegasyon an culpable violation of the Constitution, bribery, graft and corruption, betrayal of public trust, asin iba pang magagabat na akusasyon.
Sinierto man kan kampo ni VP Sara na handa siyang maghampang sa impeachment trial enkaso maipadara na ini sa Senado.
Mientras tanto, sinabi ni Senate President Pro Tempore Panfilo Lacson na tutol siya sa anuman na pag-porbar ngani ulangan an pag-convene kan Senado bilang impeachment court enkaso matanggap na ninda an Articles of Impeachment.
