Sinabi ni Senador Panfilo Lacson na nagsumiter na nin kompyuter, mga dokumento, asin iba pang ebidensya si dating Bulacan assistant district engineer Brice Hernandez nganing patunayan an suboot pagkakadawit kan nagkapirang lehislador sa anomalya sa mga flood control project.
Magigiromdomang si Hernandez, na ikinarsel sa Senado an paramientras na pinaluwas kan Sabado nganing magkuwa nin mga ebidensya na ngunyan an selyado na mantang pighahalat pa an pormal na pagsusuri.
Enot nang pinangaranan ni Hernandez sinda Senador Jinggoy Estrada, Senador Joel Villanueva, asin dating Caloocan Rep. Mitch Cajayon-Uy bilang nakinabang suboot sa kickback bagay na pignigaran kan tulong opisyal.
Mientrastanto ipigdoon ni Lacson na kaipuhang magpaliwanag si resigned DPWH Secretary Manuel Bonoan kun pano nai-deliver an labi sa P600 million gikan sa Syms Construction ki Sally Santos pasiring sa opisina kan District Engineering Office kan Bulacan.
Tinuyaw man niya an presensya ni DPWH Undersecretary Roberto Bernardo sa sarong ladawan kaiba si Hernandez asin iba pang engineer kan Bulacan 1st District.
Piglalaomang iimbitaran sinda Bonoan asin Bernardo sa masunod na hearing kan Senate Blue Ribbon Committee sa Setyembre 22.
