LEGAZPI CITY- Pinag-iimbestigaran pa sa ngunyan kan Bureau of Fire Protection an pinagpunan kan nangyari kasulo sa laog Bicol University Tabaco Campus sa Del Pilar St, Tabaco City, Albay.
Sa intrevista kan Bombo Radyo Legazpi kay Gel Molato an pamayo kan Tabaco CDRRMO, bandang alas 11:20 nin aga kan mag-apod an kapitan kan barangay nganing ireport an nangyaring kasulo sa dating admin asin registrar office sa eskwelahan.
Tulos man na nagresponde an CDRRMO na nakipagkoordinar sa mga haraning fire station sa lugar kung kaya nag-abot sa pitong fire truck an nagtabang-tabang nganing mapuho an kalayo.
Bandang alas 12:15 nin ugto o makalihis an nasa sarong oras kan maideklrar an fire out.
Segun kay Molato, posibleng hibaba man sana an danyos sa nangyaring kasulo lalo pang wara na nin mga importanteng gamit sa laog kan establishimento huli ta under repair pa ini dara kan danyos sa nakalihis na Bagyong Rolly.
Alagad pigkakangalas kan mga otoridad kung sain nagpuon an kalayo lalo pang wara man nin suplay nin kuryente sa establishimento mantang anas na mga construction worker an nasa lugar kan mangyari an insidente.
Makalihis an pagdedeklara nin gfire out nasulo man an tambak nin kahoy na nasa 100 metros an rayo sa dating registrars office na marikas man na napuho kan mga bumbero.
Sa ngunyan pighahalat pa an resulta kan imbestigasyon kan BFP nganing maaraman an pinagpunan kan kasulo.
