LEGAZPI CITY – Ipig-oofrecir ngonyan kan Albay Power and Energy Corporation (APEC) an Tawid COVID-19 Program tangarig na matabangan an mga kahimanwa sa gabat kan mga babayadan sa electricity bills sa tahaw kan pandemic.
Susog an nasabing lakdang sa Pantawid Liwanag Program kan Philippine Rural Electric Cooperatives Association Inc. (PHILRECA) na hagad na matawanan nin apat na bulan an mga konsumidores para sa installment kan babayadan.
Sa intrevista kan Bombo Radyo Legazpi ki Lesley Capus, corporate communications officer kan APEC, imbes na apat na bulan, ginibo nang anom na bulan kan power firm an pagbayad.
Sigon pa ki Capus, sabot kan kumpanya an kamugtakan kan mga kahimanwa kaya sa irarom kan nasabing programa, kaipuhan munang bayadan an 50% kan natipon na bills sa mga bulan kan Marso hasta Abril asin babangaon sa anom na bulan an installment.
Tangarig na dae madificilan an pagbabayad o paghahatod kan promissory notes, pwedeng an personahes kan APEC an maduman sa kada barangay o pwede man na magdulok sa payment outlets.
Magin an mga arrears an magigin “current-to-current” asin iwi-waive naman an penalidad.
Huli ta pirming nasa harong an mga tawo ngonyan, abiso ni Capus na magtipid sa kuryente tangarig na diit man an bayadan.
